Риёнинг оқибати
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васаллам шундай дедилар: «Қиёмат куни биринчи бўлиб ҳукм ҳисоб-китоб қилинадиганлар шаҳидлардир. Шаҳидни келтиришади, Аллоҳ таоло унга неъматларини эслатади. У тан олади. Аллоҳ ундан: «Булар эвазига нима қилдинг?» деб сўрайди. У «Сенинг йўлингда жанг қилиб, шаҳид бўлдим», дейди. «Ёлғон айтдинг! Сен одамлар «Фалончи – ботир» дейишлари учун жанг қилдинг. Улар шундай дейишди», дейди Аллоҳ таоло. Сўнг фаришталарга буюради, уни юзтубан судраб бориб, дўзахга улоқтиришади. Кейин илм ўрганган ва ўргатган, Қуръон ўқиган кишини келтиришади. Аллоҳ таоло унга неъматларини эслатади, у тан олади. У Зот «Булар эвазига нима қилдинг?» деб сўрайди. У: «Илмни ўргандим ва ўргатдим, Қуръон ўқидим», дейди. «Ёлғон айтдинг! Сен илмни одамлар олим дейиши учун ўргандинг, қори дейиши учун Қуръон ўқидинг. Улар шундай дейишди», дейди Аллоҳ таоло. Сўнг фаришталарга буюради, уни юзтубан судраб бориб, дўзахга улоқтиришади. Кейин Аллоҳ ризқини кенг қилиб қўйган, турли-туман мол-дунё ато этган киши келтирилади. Аллоҳ таоло унга неъматларини эслатади, у тан олади. У Зот: «Булар эвазига нима қилдинг?» деб сўрайди. «Сен инфоқ-эҳсон қилинишини яхши кўрган бирор йўлни қолдирмасдан Сен учун инфоқ қилдим», дейди бой. «Ёлғон айтдинг! Сен одамлар «Фалончи – сахий» дейиши учун шундай қилдинг. Улар шундай дейишди», дейди Аллоҳ таоло. Сўнг фаришталарга буюради, уни юзтубан судраб бориб, дўзахга улоқтиришади».
Имом Муслим, Насоий ва бошқалар ривоят қилишган.
«Солиҳлар гулшани» китобидан
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
