Узоқ умр сўраб дуо қилиш
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Умму Қайс розияллоҳу анҳодан ривоят қилинади:
«Расулуллоҳ соллаллоҳу алайҳи васаллам унга «Умри узоқ бўлгир, нима деди?» дедилар.
Унга ўхшаган умри узоқ аёлни билмаймиз».
Шарҳ: Имом Насаийнинг ривоятларида «Ўғлим вафот қилди. Унга қаттиқ қайғурдим. Уни юваётган одамга «Уни совуқ сув билан ювма, ўлдириб қўясан», дедим.
Укоша бориб хабарни Расулуллоҳ соллаллоҳу алайҳи васалламга айтди. Бас, У зот табассум қилдилар ва: «Умри узоқ бўлгир, нима деди?» дедилар», дейилган.
Укоша ибн Муҳсон розияллоҳу анҳу Умму Қайс бинти Муҳсон розияллоҳу анҳонинг акалари бўлади.
Расулуллоҳ соллаллоҳу алайҳи васалламнинг савол орасида бир оғиз айтган дуолари билан Умму Қайс бинти Муҳсон розияллоҳу анҳонинг умри шу қадар узоқ бўлди.
Расулуллоҳ соллаллоҳу алайҳи васаллам Абдуллоҳ ибн Буср Мозаний розияллоҳу анҳуга ҳам узоқ умр тилаганлар.
Ибн Жарир Абдуллоҳ ибн Буср Мозаний розияллоҳу анҳудан р-и:
«Набий соллаллоҳу алайҳи васаллам бошимга қўлларини қўйдилар ва:
«Бу бола бир аср яшайди», дедилар.
«Аср қанча бўлади?» дедим.
«Юз йил», дедилар».
Ҳақиқатда ҳам Абдуллоҳ ибн Буср Мозаний розияллоҳу анҳу юз йил яшадилар.
Бундан бировга узоқ умр тилаб дуо қилиш борлиги чиқади.
Анас розияллоҳу анҳудан ривоят қилинади:
«Расулуллоҳ соллаллоҳу алайҳи васаллам бизнинг уйимизга кириб турардилар. Бир кун кириб, ҳаққимизга дуо қилдилар. Шунда Умму Сулайм:
«Кичкина хизматчингизга дуо қилмайсизми?» - деди.
«Аллоҳим! Унинг молини, бола-чақасини кўпайтир, умрини узоқ қил, ўзини мағфират қил!» дедилар.
У зот менга учта дуо қилдилар. Юз учта боламни кўмдим. Меваларим, албатта икки марта ҳосил беради. Умрим шу қадар узоқ бўлдики, ҳатто одамлардан уялиб кетаман. Энди мағфиратни умид қиламан».
Шарҳ: Расулуллоҳ соллаллоҳу алайҳи васалламнинг дуолари ижобат бўлишига энг ёрқин мисоллардан бирини ҳақларига У зот томонидан дуо қилинган ҳазрати Анас розияллоҳу анҳунинг ўзлари айтиб турибдилар.
Набий соллаллоҳу алайҳи васаллам ушбу ривоятда зикр келаётган дуони нафл намоз ўқиб бўлганларидан кейин, икки қўлларини кўтариб туриб қилганлар.
Бошқа ривоятларда айтилишича, Анас розияллоҳу анҳунинг тилло ва кумушлари бўлмаган. Бошқа турдаги моллари кўп бўлган. У кишининг ўзлари, битта узукдан бошқа тиллом ҳам, кумушим ҳам йўқ деганлар.
Анас розияллоҳу анҳунинг умрлари бир юз етти ёш бўлгани ҳақида ривоятлар бор.
Анас розияллоҳу анҳунинг кўп фарзандлари 96 ҳижрий санада содир бўлган катта вабода ўлганлари айтилади. Ўшанда Басрада, уч куннинг ичида етмиш минг одам ўлган экан. Анас розияллоҳу анҳунинг етмишта боласи ўлган экан. Бу иборада бола, набира, чевара кабилар кўзда тутилган. Одамларни ўз ҳовлисига лой қилиб дафн этилган.
Мазкур икки нарса, умрнинг узоқ бўлиши ва молу болаларнинг кўп бўлиши юзага чиқибди. Энди Анас розияллоҳу анҳунинг мағфират қилинишдан ҳам умидлари бор экан. Аллоҳ таоло у кишидан рози бўлсин.
Ушбу ҳадиси шарифдан олинадиган фойдалар:
1. Бошқа кишининг молини кўп бўлишини сўраб дуо қилиш Пайғамбар соллаллоҳу алайҳи васалламнинг одатларидан эканлиги.
2. Бошқа кишининг бола-чақасини кўпайишини сўраб дуо қилиш Пайғамбар соллаллоҳу алайҳи васалламнинг одатларидан эканлиги.
3. Бошқа кишининг умрини узоқ қилинишини сўраб дуо қилиш Пайғамбар соллаллоҳу алайҳи васалламнинг одатларидан эканлиги.
4. Бошқа кишининг мағфират қилинишини сўраб дуо қилиш Пайғамбар соллаллоҳу алайҳи васалламнинг одатларидан эканлиги.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
