Агар билмасангиз, зикр аҳлидан сўранг!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Савол:
Ўлими яқинлашган кишини қибла томонга юзини мойил қилиб ёки қиблага оёғини қилиб, чалқанча ётқизилади, шу тўғрими?
Жавоб: Бисмиллаҳир Роҳманир Роҳийм
Муҳтазар, суннатга биноан, ўнг ёнбоши билан қиблага қаратиб ётқизилади. Чунки вафот этганидан кейин худди шу ҳолда қабрга қўйилади.
Расулуллоҳ соллаллоҳу алайҳи васаллам Байтуллоҳ ҳақида:
«У тиригингизнинг ҳам, ўлигингизнинг ҳам қибласидир», деганлар.
Абу Қатода розияллоҳу анҳудан ривоят қилинади:
«Набий соллаллоҳу алайҳи васаллам Мадинага келиб, Баро ибн Маърур ҳақида сўрадилар. «Эй Аллоҳнинг Расули, у вафот қилди. Молининг учдан бирини сизга васият қилди. Муҳтазар бўлганида қиблага юзлантиришга васият қилди», дейилди.
Шунда Расулуллоҳ соллаллоҳу алайҳи васаллам:
«Соф табиатни топибди. Молининг учдан бирини боласига қайтардим», дедилар».
Ҳоким ривоят қилган.
Агар бунинг иложи бўлмаса, у чалқанча ҳолда, юзи ва икки оёғи қиблага қаратиб ётқизилади. Чунки бу ҳолда унинг жағини танғиш, кўзини юмдириш осон бўлади. Маййит қотганда букилиб қолмайди.
Валлоҳу аълам.
«Зикр аҳлидан сўранг» китобидан
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
