АЁЛЛАРГА ИПАК ВА ТИЛЛО ЖОИЗ
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Анас розияллоҳу анҳу: «Набий соллаллоҳу алайҳи васалламнинг қизлари Умму Гулсум алайҳассаломнинг устиларида ипак чопонларни кўрдим», деди». Бухорий, Абу Довуд ва Насаий ривоят қилган.
Шарҳ: Аввалги ҳадисларда ипак ва тиллонинг ҳаромлиги ҳақида умумий гаплар келган эди. Фақат битта ҳадисда бу нарсалар Пайғамбар соллаллоҳу алайҳи васалламнинг эркак умматларига ҳаром қилинганлиги таъкидланган эди. Энди эса ўша умумий ҳукмдан муслима аёллар истисно қилингани, улар учун ипак кийим ҳам, тилло ҳам ҳалолигини амалда кўрсатувчи ривоятлар келтирилмоқда.
Пайғамбар соллаллоҳу алайҳи васалламнинг қизлари Умму Гулсум розияллоҳу анҳо ипакдан тикилган тўн кийиб юрганлари, бу нарса аёлларга ҳалол эканлигининг ёрқин далилидир.
Али розияллоҳу анҳудан ривоят қилинади: «Набий соллаллоҳу алайҳи васаллам менга ипак чопон ҳадия қилдилар. Мен уни кийиб олдим. Шунда Набий соллаллоҳу алайҳи васалламнинг юзларида ғазаб аломатини кўриб қолдим. У зот менга: «Мен буни сенга кийишинг учун юборганим йўқ. Мен буни сенга уни йиртиб аёлларга рўмол қилиб беришинг учун юбордим», дедилар». Икки шайх ва Насаий ривоят қилган.
Шарҳ: Бу ривоятда эркак кишига ҳаром бўлган ипак нарса аёлларга ҳалол эканлиги ҳам сўз билан таъкидланмоқда.
Пайғамбар соллаллоҳу алайҳи васаллам ҳазрати Али розияллоҳу анҳунинг ипак чопонни ўзлари кийиб олганларини кўриб, аччиқлари чиқиши ва у чопонни йиртиб аёлларга рўмол қилиб беришлари зарурлигини таъкидлашлари ўша сўздир.
Бошқа бир ривоятда ҳазрати Али, ўша чопонни йиртиб, Фотималарга рўмол қилиб бердим, деган эканлар. Фотималар; ҳазрати Алининг оналари, Фотима бинти Асад, у кишининг хотинлари, Пайғамбар соллаллоҳу алайҳи васалламнинг қизлари, Фотима онамиз, Ҳазрати Алининг амакилари, Ҳамза ибн Абдулмуттолибнинг қизлари, Фотима бинти Ҳамза розияллоҳу анҳунналар эканлар.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
