Аллоҳ сизни оламларга раҳмат қилиб юборди
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Бизларни Аллоҳ уммати Муҳаммад қилди ва бу билан умматларнинг афзали бўлдик. Ҳаттоки Мусо калимуллоҳ билан Исо руҳуллоҳ қани энди Муҳаммадга уммат бўлсак деб орзу қилдилар. Ҳа биродарлар Аллоҳ билан тўғрима-тўғри гаплашган Мусо калимуллоҳ сиз билан бизни ўрнимизни орзу қилдилар.
Аллоҳ Ла Илаҳа Иллаллоҳ калимасини жамики умматларга берди. Лекин Муҳаммад Расулуллоҳни фақат бизга берди. Муҳаммадар Расулуллоҳ ҳақиқатан ҳам неъматуллоҳдир. Оламларга раҳмат бўлган бу улуғ зотнинг фазилатлари билан умматларнинг охиргиси ва жаннатга кирадиганларнинг биринчисимиз инша Аллоҳ.
Аллоҳ таоло бу зотдан истаганингизни сўранг ижобат қиламан деганида Расулуллоҳ соллаллоҳу алайҳи васаллам ё Аллоҳ умматим, ё Аллоҳ умматим деб ёлвордилар ва айтдиларки, Аллоҳ билмасдан туриб гуноҳ қилсак бизларни азоблама, унутиб гуноҳ қилсак бизларни азоблама, мажбур бўлиб гуноҳ қилсак бизларни азоблама дедилар.
Ё Расулуллоҳ сизнинг ёшларга бўлган меҳрингиз башарият тарихидаги энг гўзал ва такрорланмас меҳр эди. Саждага эгилсангиз невараларингиз Ҳасан билан Ҳусайн розияллоҳу анҳумолар устингизга чиқиб олишар ва сиз болаларнинг ўйини бузилмасин деб саждада узоқ турардингиз. Намоз кўзингиз қувончи эди, лекин шунга қарамай намоз вақтида бирор-бир бола йиғласа онаси безовта бўлмасин деб намозни қисқа қилардингиз.
Сизнинг дуойингиз ила Абдуллоҳ ибн Аббос фақиҳ бўлдилар ва сизнинг мўъжизангиз ила Жобир ибн Абдуллоҳ катта миқдордаги қарздан халос бўлдилар.
Дунё тарихидаги энг бахтли ёшлардан бири бўлга Анас ибн Моликни 10 йил тарбияладингиз ва бу нарса ўз самарасини кўрсатиб у зот сиздан 2286 ҳадис ривоят қилдилар ва биз у зотдан динимизни анча қисмини ўргана олдик.
Куфрнинг боши бўлган Абу Жаҳллар «Аллоҳим шу Қуръон сени ҳузурингдаги ҳақ китоб бўлса бизларга аламли азоб юбор» дедилар. Лекин Аллоҳ у зотни нафақат мусулмонларга балки ғайридинларга ҳам раҳмат қилиб юборган эди.
Сизнинг фазлингиз ила Аллоҳ «Уларни азобламади ва уларнинг ичида сиз турганингизда мен уларни азобловчимасман» деди.
Аллоҳим ўз каломингда «Албатта биз сизни оламларга раҳмат қилиб юбордик» деганингда нақадар рост сўзладинг.
Нуриддин Фатхуллаев
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
