Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Бир киши вафот этди. Ортидан иккита ёки ундан ортиқ қизлар ва қиз набиралар қолди. Бу ҳолатда қизлар мероснинг учдан иккисини оладилар ва қиз набираларни ҳажб қиладилар. Яъни қиз набира ёки набиралар мерос олмайдилар.

Аммо худди шу ҳолатга битта ўғил набира ёки чевара қўшилса, унинг сабабидан қиз набира ёки набиралар ҳам мерос оладилар. Шунинг учун ҳам бундай биродар «муборак биродар» деб аталади. Унинг баракаси туфайли сингиллари ҳам меросдан баҳраманд бўладилар.

Яна бир мисол. Бир киши вафот этди. Орқасидан туғишган опа-сингиллари ва ота бир синглиси қолди. Бу ҳолатда туғишган опа-сингиллар мероснинг учдан иккисини оладилар ва ота бир сингилни ҳажб қиладилар. Яъни ота бир сингил мерос олишдан маҳрум бўлади.

Аммо шу ҳолатда ота бир биродар ҳам бўлса, унга қўшилиб, ота бир сингил ҳам мерос олади. Бу биродар ҳам муборак биродар бўлади.

«Ҳадис ва ҳаёт» китобидан