1445 йил 19 Рамазон | 2024 йил 29 март, жума
Минтақа:
ЎЗ UZ RU EN
Ислом

Махсус дуолар ҳақида - видолашув дуоси

19:14 / 21.03.2018 5998 pdf Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

4653. Ибн Умар розияллоҳу анҳумодан ривоят қилинади:

«У киши сафарни ирода қилган одамга «Менга яқин кел. Сен билан Расулуллоҳ соллаллоҳу алайҳи васаллам биз ила видолашганларидек видолашиб қўяй. У зот «Аставдиъуллоҳа дийнака ва амонатака ва хавотийма аъмолика», деб айтардилар», дер эди».

«Сунан» эгалари ривоят қилганлар.

Шарҳ: Сафарга жўнаб кетаётган одам билан видолашув мустаҳабдир. Ушбу ривоятдаги Расулуллоҳ соллаллоҳу алайҳи васаллам айтган сўзларнинг маъноси «Аллоҳдан динингни, аҳли аёлингни, молу мулкингни ва ишларингнинг охирини муҳофаза қилишини сўрайман»дир.

4654. Анас розияллаҳу анҳудан ривоят қилинади:

«Бир киши Расулуллоҳ соллаллоҳу алайҳи васалламнинг ҳузурларига келиб:

«Эй Аллоҳнинг Расули! Албатта, мен сафар қилмоқчиман, менга зоди роҳила беринг», деди.

«Аллоҳ тақвони сенга зоди роҳила қилиб берсин», дедилар.

«Яна зиёда қилинг», деди.

«Гуноҳингни мағфират қилсин», дедилар.

«Яна зиёда қилинг, ота-онам сизга фидо бўлсин!» деди.

«Қаерда бўлсанг ҳам сенга яхшиликни осон қилсин», дедилар».

Термизий ва Ҳоким ривоят қилганлар.

Шарҳ: Зод – сафарда керак бўладиган озуқа. Роҳила – сафарда керак бўладиган улов.

Ушбу ҳадиси шарифдан олинадиган фойдалар:

1. Сафарга чиқишдан олдин аҳли илм ва аҳли фазл кишилардан дуо ва насиҳат олиш кераклиги.

2. Сафарга чиқадиган одамга тақво сўраб дуо қилиш кераклиги.

3. Сафарга чиқадиган одамга мағфират сўраш кераклиги.

4. Сафарга чиқадиган одамга яхшилик осон бўлишини сўраш кераклиги.

4655. Абу Ҳурайра розияллоҳу анҳудан ривоят қилинади:

«Бир киши:

«Эй Аллоҳнинг Расули! Албатта, мен сафар қилмоқчиман, менга насиҳат қилинг», деди.

«Аллоҳга тақво қилишни, ҳар баландликда такбир айтишни ўзингга лозим тут», дедилар.

Ҳалиги одам ортига қайтганидан кейин «Аллоҳим! Унга ерни яқин қилгин ва унга сафарни осон қилгин», дедилар».

Термизий ҳасан санад ила ривоят қилган. Аллоҳ билгувчироқдир.

Шарҳ: Ушбу ҳадиси шарифдан олинадиган фойдалар:

1. Сафарга чиқишдан олдин аҳли илм ва аҳли фазл кишилардан насиҳат олиш кераклиги.

2. Сафарга чиқадиган одамни тақвога ва сафар одобларига риоя қилишга чорлаш кераклиги.

3. Сафарга чиқадиган одамнинг ҳаққига дуо қилиш кераклиги.


Шайх Муҳаммад Содиқ Муҳаммад Юсуф

  (Ҳадис ва ҳаёт китобидан)



Муаллиф
islom.uz
Мавзуга оид мақолалар
4569. Абу Ҳурайра розияллоҳу анҳудан ривоят қилинади.Расулуллоҳ соллаллоҳу алайҳи васалламshyнинг.Аллоҳ раҳматни юз қисмга бўлди. Тўқсон тўққиз қисмини ўз ҳузурида давоми...

3386 23:48 / 21.01.2018
Кеча қоронғу эди. Осмондаги зулматни парчалаб ташлайдиган ой ҳам кўринмасди. Ҳали шаҳарлар нур кўрмаган. Аммо гўшт ва қондан иборат бир Ой Мадина кўчаларида қадам давоми...

2362 11:00 / 14 февраль
1. Ризқдаги баракотни кўпайтиринг.Ҳар бир мусулмон ризқини ҳалолдан таъминлаши лозим. Бу эса Ислом арконлари ва қадриятларига зид бўлмаган йўллар билан касб давоми...

8523 16:14 / 08.04.2017
1. Балони даф қилади.Анас розияллоҳу анҳудан ривоят қилинади .Набий соллаллоҳу алайҳи васаллам .Албатта, садақа Роббнинг ғазабини ўчиради ва ёмон ўлимни даф давоми...

969 10:38 / 25 март
Аудиолар

118786 11:58 / 10.10.2018
«Ҳилол» журнали
Китоблар

40737 14:35 / 11.08.2021