Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Расмда квазарнинг тахминий сурати акс этган.

Квазар – галактика ядросида пайдо бўладиган, кучли радионурланишга эга бўлган, коинотдаги энг ёрқин объектдир.

Ердан 2,44 миллиард ёруғлик йили узоқликда жойлашган квазар 3C 273 Қуёшдан тахминан тўрт триллион марта ва галактикамиздаги барча юлдузларни жамлагандан 100 марта ёрқинроқ.

Биз Қуёшга тикилиб қаролмаймиз, бу квазар эса қуёшимиздан тўрт триллион марта ёрқинроқ экан. Тасаввур қиляпсизми?

Проксима Центавр бизга энг яқин юлдуз бўлиб, Қуёш тизимидан 4,23 ёруғлик йили узоқликда жойлашган.

Агар квазар 3C 273 сайёрамиздан 33 ёруғлик йили узоқликда бўлганида, яъни бизнинг энг яқин юлдузимиздан 7,8 марта узоқда бўлса, у осмонда худди ҳаво очиқ пайтдаги қуёш каби ёрқин порларди.

Ваҳоланки, Қуёш Ердан атиги саккиз ёруғлик дақиқаси узоқда бўлиб, шунчалик ёрқин порлайди.

Осмондаги бир жисмнинг бу қадар улканлиги, ёрқинлиги, энергияси Аллоҳ таолонинг қудратига, азаматига, буюк мусаввирлигига далолат қилади.

Бу квазарнинг нақадар улканлиги, ёрқинлиги, энергияси борасидаги қолган тафаккурни ўзингиз давом эттиринг.

Аллоҳ таоло Қуръони Каримда шундай марҳамат қилади:

ﯩ ﯪ ﯫ ﯬ ﯭ ﯮ ﯯ ﯰ ﯱﯲ ﯳ ﯴ ﯵ ﯶ ﯷ ﯸ

«Бу Аллоҳнинг яратганидир. Қани, Менга кўрсатинг-чи, Ундан бошқалар нимани яратдилар. Йўқ! Золимлар очиқ-ойдин адашувдадирлар» (Луқмон сураси 11-оят).

Худо бўлгани учун У Зот шуларни яратган. Сизлар, эй мушриклар, Аллоҳдан бошқа яна худолар бор, деяпсизми? Агар улар сиз айтганингиздек, худо бўлса, қани, айтинг-чи, улар нимани йўқдан бор қилиб, яратганлар? Улар яратган нарсаларни кўрсатинглар-чи!

«Йўқ! Золимлар очиқ-ойдин адашувдадирлар».

Йўқ, у сохта худолар ҳеч нарсани ярата олмаслар. Аллоҳга ширк келтириш ила катта зулм қилган мушриклар очиқ-ойдин адашувдадирлар.

Нозимжон Ҳошимжон тайёрлади

Ушбу мақола Ўзбекистон Республикаси Дин ишлари бўйича қўмитанинг 2023 йил 30 ноябрь 03-07/9089-сонли хулосаси асосида тайёрланди.