Ватан ҳақида
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ўстириб бизни авайлаб, бахтиёр айлар Ватан,
Толею иқболимизни баркарор айлар Ватан,
Асрагаймиз қорачиқдек жону дилда шаънини,
Ботир ўғлонлар билан чин ифтихор айлар Ватан,
Жумла инсонга азиздир, ўз туғилган гўшаси,
Яшнатиб ҳар бир қўнгилни, навбаҳор айлар Ватан.
Ҳақ Расул севмоқ ватанни дебди, иймондан нишон,
Тоза меҳрин жону жисмингга мадор айлар Ватан.
Қўллагай мисли падардек, онадек парвонадир,
Йўллабон парвозга доим, устувор айлар Ватан,
Барча донолар ватан деб қилди иншо розини,
Ўзлигин оқилга ҳар дам ошкор айлар Ватан.
Сидқидил хизматда бўлсанг, топса равнақ, қучса шон,
Бизни ҳам охир шарафли шоҳсувор айлар Ватан.
Кўрсатур омадга йўлни, чорлагай қилсанг сафар,
Тўлдириб қалбингни нурга, беғубор айлар Ватан.
Илтифотин кўрсатур хаттоки ғунча - гулга ҳам,
Она бола соғлигига эътибор айлар Ватан.
Жонажон юртингни севгил, куйлагил Абдулаҳад,
Сенга битмас бахт саодатлар нисор айлар Ватан.
ЎЗБЕГИМ ЎҒЛОНЛАРИ
14 - январ Ватан химоячилари кунига
бағишланади.
Буюк Темур издоши, она юрт посбонлари
Сарҳадларда кўп хушёр, ўзбегим ўғлонлари.
Она юрт тупроғини авайлаб тавоф этиб,
Қўриқлар мардонавор, ўзбегим ўғлонлари.
Олий бош қўмондоннинг измидадир ҳар нафас,
Тинчликка метин пойдор, ўзбегим ўғлонлари.
Ватанпарвар, фидоий, қалби тўла жасорат,
Ҳарб илмида бетакрор, ўзбегим ўғлонлари.
Шул сабабдан осойиш, ҳар манзилу ҳар макон,
Хамиша сергак бедор, ўзбегим ўғлонлари.
Машқда чаққон, жангда мард, иродаси тобланган,
Асли лочинкўз, шунқор ўзбегим ўғлонлари.
Абдулаҳад қутлагай Алпомиш издошларин,
Ўз онтида устувор, ўзбегим ўғлонлари.
Абдулаҳад Шаҳрихоний
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
